ဗစ်တိုးရီးယားအမှု တစ်ခုခု လွဲချော်ခဲ့ပါက ရဲတပ်ဖွဲ့ အပြည့်အဝ တာဝန်ခံရမည်ဟု ထပ်မံသတိပေး

3249

ဗစ်တိုးရီးယား အမှု လွဲချော်မှု ဖစ်ပေါ်ပါက တာဝန်ယူမှု တာဝန်ခံမှု အပြည့်နှင့်တာဝန်ခံရမည်ဟု အစိုးရ ထပ်မံသတိပေး

နေပြည်တော်၊ စက်တင်ဘာ ၁၃ (သတင်းတမန်)

ဗစ်တိုးရီးယား အမှုနှင့်ပတ်သက်၍ လွဲချော်မှုတစ်စုံတစ်ရာဖြစ်ပေါ်ပါက တာဝန်ယူမှု တာဝန်ခံမှု အပြည့်နှင့် တာဝန်ခံရမည်ဟု နိုင်ငံတော်သမ္မတရုံးက ထပ်မံသတိပေးလိုက်သည်။

ယနေ့ ညနေက နေပြည်တော်သမ္မတအိမ်တော်တွင် ပြုလုပ်ခဲ့သည့် Press Briefing တွင် သမ္မတရုံးပြောခွင့်ရ ဦးဇော်ဌေး က ပြောကြားခဲ့ခြင်းဖြစ်သည်။ ယခုထိ ဗစ်တိုးရီးယား အမှုကို စောင့်ကြည့်နေကြောင်း ဦးဇော်ဌေးက ဆိုသည်။

“လွဲချော်မှုတွေတစ်စုံတစ်ရာဖြစ်တယ်ဆိုရင် တာဝန်ယူမှု တာဝန်ခံမှုအပြည့်နဲ့ တာဝန်ခံရမယ်။ တောက်လျှောက် ကျနော်တို့စောင့်ကြည့်နေတယ်” ဟု ၎င်း ကဆိုသည်။

အမှုပြီးပြတ်ချိန်တွင် တရားခံမှာ ခု ဖမ်းဆီးထားသည့် အောင်ကြီးမဟုတ်ပါက ရဲတပ်ဖွဲ့အား အရေးယူမည်လားဟု မေးမြန်းရာ ဦးဇော်ဌေး က “အမှုကလည်း မပြီးပြတ်သေးဘူး။ စောင့်ကြည့်ပေါ့” ဟု ပြန်လည်ဖြေကြားခဲ့သည်။

ပြီးခဲ့သည့် Press Briefing တစ်ခုတွင်လည်း သမ္မတရုံးက ယင်းသို့ တစ်ကြိမ် သတိပေးခဲ့သေးသည်။

ဗစ်တိုးရီးယား အမှုတွင် ကျူးလွန်သူအဖြစ် ယာဉ်မောင်း ကိုအောင်ကြီးကို ရဲတပ်ဖွဲ့က စွပ်စွဲဖမ်းဆီးတရားစွဲထားသည်။ ယင်းကိစ္စနှင့်ပတ်သက်၍ ရဲတပ်ဖွဲ့ ဒုရဲချုပ် ရဲမှူးချုပ် အောင်နိုင်သူက သမ္မတရုံးတွင် သတင်းစာရှင်းလင်းချိန်က ကလေးကိုယ်တိုင် ရွေးချယ်သည့် ကျူးလွန်သူသည် အောင်ကြီးဖြစ်သည်ဟု သတင်းထောက်များကိုပြောဆိုခဲ့သည်။

သို့သော် နောက်ဆုံးပြုလုပ်ထားသည့် ရုံးချိန်းတွင် ကျူးလွန်ခံရသူ Victoria ကလေးငယ် က အမှုကျူးလွန်သူသည် ကိုကိုနှင့်ညီညီ ဖြစ်သည်ဟု တရားခွင်၌ ထွက်ဆိုခဲ့သည်။

ဗစ်တိုးရီးယား အမှုနှင့်ပတ်သက်၍ အခင်းဖြစ်ပွားသည့် မူကြိုကျောင်းသည် လူကယ်ပြန်ဝန်ကြီးဌာနအောက်တွင်ရှိပြီး ကျန် ပုဂ္ဂလိကကျောင်းများမှာ ပညာရေးဝန်ကြီးဌာနအောက်တွင် ရှိသဖြင့် ပညာရေးဝန်ကြီးဌာနက တစ်ခါသွားရောက်စစ်ဆေးခဲ့ရာ စည်းမျဉ်းနှင့်ကိုက်ညီမှုရှိကြောင်း ဦးဇော်ဌေးက ရှင်းပြသည်။

လက်ရှိတွင် အခင်းဖြစ်ပွားသော မူကြိုကျောင်းကိုမူ လူကယ်ပြန်ဝန်ကြီးဌာနကယာယီပိတ်ခိုင်းထားသည်။

(သတင်းတမန်)

လေးစားစွာဖြင့် ခရက်ဒစ်

Facebook Comments
2K Shares